БИШКЕК, 28-сен. — Sputnik. Бир катар жалпыга маалымдоо каражаттары (ЖМК) 26-сентябрда түштөн кийин Сузак районунун Бек-Абад айылында "Республика – Ата-Журт" саясий партиясынын тең төрагасы Камчыбек Ташиев менен "Өнүгүү-Прогресс" саясий партиясынан депутаттыкка талапкер Абдыманап Абдыбахаповдун ортосунда кайым айтышуу болуп, ал мушташка чейин жеткенин жазып чыгышкан.
Абдыбахапов ооруканада дарыланып жатканын өзү Sputnik агенттигине ырастады. Эгер Ташиев аны сабаган жокмун десе, Куранды кармап туруп айтсын дейт ал.
"Кудайга шүгүр, кабыргаларым сынбаптыр. Бирок тепкилеп урганда денем көк ала болуп калыптыр. Дене көк ала болгондо сынгандан да катуу ооруйт экен", — дейт ал.
Абдыбахаповдун билдиришинче, Ташиев менен анын ортосундагы мушташ улуттук азчылык маселесинен улам келип чыккан.
"Биринчи инилерин мени алып кел деп жөнөтүптүр. Мен барбайм деп аларды жолго салгам. Бир сааттан кийин ал өзү келиптир. Кулактан, чачтан кармап тепкиледи. Бул жерде сегиз адам келип уруп кетип атат. Биздин саясий партиянын атрибуттарын ал өзү баш болуп жулду. Эркек болсо, жалгыз чыкпайт беле", — дейт ал.
Ал эми "Республика — Ата-Журт" партиясынын тең төрагасы Камчыбек Ташиев тараган бул маалыматтарды алардын партиясына карата болгон чагымчыл аракет экенин ЖМКларга билдирген.
Анын айтымында, Абдыбахапов аны сүйлөшүү үчүн штабга чакырган. Бирок ал Ташиевди провокациялап, аны менен мушташууга аракет кылган. Анын кийимин айрып койгонун, Абдыбахапов өзү эле отургучтарга чалынып кулап, "мени өлтүрдү, кабыргаларымды сындырды, мен азыр журналисттерди чакырым, арыз жазам" деп кыйкырып-өкүргөнүн билдирген.
Ал ортодо Борбордук шайлоо комиссиясы Ташиев тизмеден, ал эми партия жарыштан алынышы мүмкүн экенин билдирди. БШК мүчөсү Канатбек Азиздин айтымында, талапкерлер ортосундагы мушташ орчундуу мыйзам бузуу болуп эсептелинет.
"Эгер Ташиевге карата кылмыш иши козголсо, ал тизмеден алынышы мүмкүн. Бул "Республика — Ата-Журт" партиясынын же алардын жакындарынын башка партиялардын өкүлдөрүн ур-токмокко алган биринчи эле учур эмес. Мындан партия, жок дегенде, эскертүү алат, болбосо шайлоо жарышынан алынат", — дейт БШК мүчөсү.
Абдыманап Абдыбахаповдун денесине залал келип, ал ооруканага жаткырылган. Жабырлануучу ошондой эле, анын чөнтөгүнөн 20 миң долларды алып кетишкенин кошумчалады.
Үстүбүздөгү жылдын 4-октябрына белгиленген парламенттик шайлоого 14 партия катышат.
