Айыл башчы Кудайберди Маматовдун айтымында, учурунда Алмалык айылы түздөн-түз Москванын камкордугунда болгон. Себеби, ал жакта көмүр шахтасы иштеген. СССР урагандан кийин айылга таза суу алып келе турган куурлар талкаланып иштен чыккан. Ошондон бери айыл тургундары сууну каналдан ташып ичишет.
Баатыр эне Панар Карымшакова бир тонна сууну 350 сомдон сатып алышарын айтат.
"Иче турчу сууну машиналар менен алып келебиз. Бир тонна сууну 350 сомдон сатып алабыз. Бул сууну өзүбүз ичебиз, малга беребиз жана бак-дарактарды сугарабыз. Башка суу жок болгондуктан аргасыздан ичебиз", — дейт ал.
Президент түштүк аймакка болгон иш сапары маалында Алмалык айылынын тургундары менен жолугуп, көйгөйүн уккан. Өлкө башчыны коштоп Баткен, Ош облусундагы өкмөттүн өкүлдөрү, Ош шаарынын мэри жана башка аткаминерлер барган.
Ош шаарынын мэри Айтмамат Кадырбаев айылдыктардын турган жер шаардын балансына өтөрүн билдирип, инфраструктураны жакшыртууга чаралар көрүлөрүн айткан.
