НООКАТ, 17-сен. – Sputnik. Ош шаарына караштуу Алмалык айылында 13-сентябрда кечки саат 8:30да тоо көчүп, 25 үйгө кооптуулук жаралган. Бул тууралуу аталган айылдын башчысы Кудайберди Маматов билдирди.
Өлкө башчысы Алмазбек Атамбаевдин Баткен облусуна болгон иш сапарынын жүрүшүндө айыл тургундары менен жолугуп, алардын көйгөйлөрүн укту.
Табигый эмес тоонун көчүшү 25 үйгө кооптуулук жараткан. Анын ичинен эң кооптуу делген үйдүн тургундары ӨКМдин чатырларына көчүрүлүп, учурда 57 кишиден турган он кожолук чатырда күн кечирип жатат.
Алмалыктыктардын дагы бир көйгөйү жер маселеси экенин Маматов баса белгиледи.
"Айылдын жери Ноокат районуна караса, эл Ош шаарына карайт. Ошентип, социалдык маселелер чечилбей келген. Учурда бул маселе да каралып, чечилди. Жер Ош шаарынын балансына которула турган болду", — деди ал.
Ош шаарынын мэри Айтмамат Кадырбаев кооптуу делген 25 үй коңшу Кара-Таш айылына көчүрүлө турганын белгиледи.
Өзгөчө кырдаалдар министри Кубатбек Боронов жалпысынан 5 миллион кубометр жер көчкөнүн белгилеп, алмалыктардын жер маселеси да каралып жатканын кошумчалады.
"Азыр жерди Ош шаарынын же Ноокат районунун карамагына берүү маселелеси каралып жатат. Бул жердеги үйлөрдүн кызыл китепчелери жок", — деди министр.
Боронов учурда өлкө боюнча 1,5 миңден ашык киши жердин көчүп кетүү кооптуулугу жаралган аймактарда жашап жатканын айтты.
Алмалык айылы 1960-жылдары түптөлүп, учурда 162 кожолук бар. Калкынын саны 887 киши.
