Кара-Балтада Жусуп Баласагын атындагы диний агартуу борбору ишке кирди

БИШКЕК, 20-сен. — Sputnik. Чүй облусунун Жайыл районуна караштуу Кара-Балта шаарында "Жусуп Баласагын" атындагы диний агартуу борбору ачылды. 

Ага катышкан Кыргызстан мусулмандарынын муфтийи Максатбек Токтомушев борбордун ачылышы элдин жана мамлекеттин бакубат жашоосун илгерилетүүдө, ислам динин калкка туура жайылтууда чоң өбөлгө болот деген ишенимин айтты.

Салтанатка Чубак ажы Жалилов, Чүй облусунун мусулмандар казысы Танабаев Нурлан, ИИМдин Кара-Балта шаардык башкармалыгынан өкүлдөр жана Казакстандык дин ишмерлери катышты.

"Коңшу казак жергесинен келген дин аалымдары мындай диний агартуу борборлордун ачылышы Кыргызстанда эле эмес, Борбор Азия чөлкөмүндө дин аалымдары менен билимдүү инсандарды тарбиялап, ислам динин, Абу Ханифа мазхабын жайылтууда эбегейсиз эмгек жаратмакчы деген пикирлерин билдирди", — деп айтылат муфтият тараткан маалыматта.

Чүй облусунун казысы Танабаев Нурлан Кара-Балта шаарында ачылган бул диний агартуу борборунун баш имамдарын буйрук аркылуу дайындап, иштерине ийгиликтерди каалады.