Атамбаев: Түрк тилдүү өлкөлөргө орток телеканал аймакты өнүктүрүүгө шарт түзөт

БИШКЕК, 11-сен. — Sputnik. Түрк тилдүү мамлекеттерге орток эл аралык каналынын түзүлүшү аймактын маалымат айдыңындагы өнүгүүсүнө шарт түзө турганын президент Алмазбек Атамбаев Астанада өткөн Түрк тилдүү өлкөлөрдүн V саммитинде билдирди.

2014-жылдын 5-июнунда Түркиянын Бодрум шаарында өткөн түрк тилдүү мамлекеттердин 4-саммитинде Казакстандын президенти Нурсултан Назарбаев бирдиктүү түрк телевизиондук каналын ачуу демилгесин көтөргөн. Бир жыл бою мамлекеттердин тийиштүү министрлик менен мекемелери бул багытта иш алып барышты.

Атамбаев саммит түрк тилдүү мамлекеттердин маалымат жаатында кызматташуусун өнүктүрүүнү да камтый турганын, бул маданий-гуманитардык байланыштарды кеңейтерин белгиледи.

"Адамзат кооптуу турмушту башынан кечирүүдө. Технологиялардын өнүгүп, маалыматтык согуш менен терроризм күчөп турганда Эл аралык түрк каналын түзүү түбү бир элдердин биримдүүлүгүн, тышкы коркунучтарга туруштук берүү мүмкүнчүлүгүн арттырат", — деди президент.

Саммит соңунда Түрк тилдүү мамлекет башчыларынын жыйынтык документтерге кол коюу аземи болуп өттү.