БИШКЕК, 10-сен. — Sputnik. Шайлоо тизмесинен атын тактоо боюнча 6-сентябрда башталган "Өзүңдү тизмеден тап" акциясынын алкыганда үч күн ичинде 300 миңден ашык шайлоочу өлкө аймагындагы 2325 шайлоо участкаларынан өз аты-жөнүн тактады. Бул тууралуу өкмөттүн маалымат кызматы билдирди.
4-октябрга белгиленген парламенттик шайлоодо добуш берүүдө биринчи жолу биометрикалык маалыматтар колдонулат. Шайлоочулардын саны 2 миллион 605 миң адамга жеткенин биринчи вице-премьер-министр Тайырбек Сарпашев буга чейин билдирген болчу. Аты-жөнүн текшергендердин алдында Ош, Жалал-Абад, Ысык-Көл, Нарын облустарынын тургундары менен Ош шаарынын тургундары келүүдө. Ал эми Бишкек шаарынын тургундары буга эч шашылган жок. Мисалы, Ош шаарында күнүнө 15 миң киши өзүн тизмеден текшерип жатса, бул көрсөткүч Бишкек шаарында үч миңден бир аз гана ашат.
"Өзүңдү тизмеден тап" акциясы 16-сентябрга чейин уланат.
