БИШКЕК, 8-сен. – Sputnik. Чечен Республикасынын башчысы Рамзан Кадыров батыш менен АКШнын тышкы саясатынын айынан өз өлкөлөрүнөн качууга аргасыз болгон мигранттардын көйгөйлөрүн чечүү үчүн ислам өлкөлөрүнүн лидерлерин баш кошууга чакырат. Бул туурасында ал өзүнүн интернеттеги жеке баракчасына жазган.
"Батыш менен АКШ өйдө жактан туруп алып демократияны, адам укуктарын айтып, адам өмүрүнөн артык эч нерсе жок дешет. Ал эми иш жүзүндө Афганистан, Ирак, Сирия, Палестина, Ливия, Йемен, Алжир, Судан, Сомали жана башка ислам динин туткан өлкөлөрдө ондогон миллион адамдардын кайгы-муңуна себепкер болуп жатат. АКШ менен Европа бул өлкөлөрдү кыйратып, экономикасын жок кылып, узакка созулган ички чыр-чатактарды чыгарып, аргасы түгөнгөн элди өз жеринен качууга мажбур кылды", — деп жазат Кадыров.
Ал качкындар согуштан жана ачкачылыктан Европа өлкөлөрүн көздөй качып, жолдо каза болуп жатышканын белгилейт. Ал эми деңиз, анын айтымында, "Африка жана Азия өлкөлөрүнүн миңдеген жарандары үчүн көрүстөнгө айланды".
Ошол эле учурда Европа өлкөлөрү бул окуялардын чыныгы себептери жөнүндө ооз ачпайт деп улантат Кадыров.
"Биз коркунуч алдында турган алсыздарга, үй-жайсыз калгандарга кам көрүүгө милдеттүүбүз. Ошондуктан Түркия, Сауд Аравия, Араб Эмираты, Катар, Оман, Бахрейн, Кувейт, Иордания, Индонезия, Малайзия, Казакстан, Түркмөнстан, Өзбекстан, Азербайжан, Тажикстан жана башка бардык мусулман өлкөлөрүнүн лидерлерин өзүбүздүн диний бир туугандарыбызды коргоого чакырам", — деп жазат ал.
"Эгер Батыштын адамкерчиликсиз саясатына бүгүн каршы чыкпасак,… эртең кеч болуп калышы мүмкүн" деп баса белгилейт Кадыров.
Жума күнү БУУнун качкындардын иши боюнча Жогорку комиссары Антониу Гутерреш ЕБге мүчө мамлекеттерди азыр Грецияда, Венгрияда жана Италияда турган качкындарды квоталык система боюнча өз ара 200 миңден кем эмес адамдан бөлүштүрүүгө чакырды.
