БИШКЕК, 4-сен. — Sputnik. Бишкекте таксистти бурама бекиткич менен көкүрөккө сайып өлтүрүп кетишкен деп билдирди ШИИБдин маалымат кызматы.
"Туңгуч" кичи районундагы №7 троллейбустун аялдамасынан азият түспөлүндөгү эркек киши 26-август күнү эртең менен 36 жаштагы таксистке кол салган.
Тергөөнүн жүрүшүндө жабырлануучу менчик такси айдап оокат кылгандыгы аныкталган. Милициянын айтымында, "Туңгучтагы" такси токтотуучу жайда кардарларды кезек менен ала тургандыгы боюнча оозеки макулдашып алышкан. Милициядан, ошол күнү эртең менен чоочун киши келип, кардарды кезеги жок эле сүйлөшүп алып кеткен. Бир аздан кийин ал дагы келип, экинчи кардар менен сүйлөшө баштаган. 36 жаштагы жергиликтүү таксист аны менен сүйлөшүүгө аракет кылып, акырында сөгүшүү мушташка чейин жетип, чоочун киши "туңгучтук" таксистти көкүрөк тушка бурама бекиткич менен сайып жиберген. Окуядан кийин кол салган киши изин жашырган деп билдиришти ШИИБден. Жанындагы таксисттер "Тез жардам" менен милиция чакырышкан. Жарадар болгон эркек киши Улуттук хирургия борборуна жаткырылгандан кийин көз жумган.
Аталган факты боюнча Кылмыш жаза кодексинин 104-беренеси боюнча кылмыш иши козголгон.
Издөө иштеринин натыйжасында, Октябрь райондук ички иштер бөлүмүнүн кылмыш иликтөө бөлүмүнүн кызматкерлери Жалал-Абад облусунда туулган 30 жаштагы жаранды кармады.
Ал сурак учурунда жасагандарын мойнуна алып, күбөлөр аны тааныгандан кийин №1 СИЗОго киргизилди.
