БИШКЕК, 21-авг. — Sputnik. "Ислам мамлекети" террористтик тобунун Сириянын чыгышындагы Меядин шаарында орун алган 16 согушкери ВИЧке чалдыкканы аныкталганы жөнүндө Сириянын ARA News көз карандысыз агенттиги кабарлады.
Агенттиктин маалыматына караганда, көпчүлүгү чет элдиктерден турган согушкерлер жергиликтүү ооруканага карантинге жаткырылган.
Британиянын Daily Mail гезити ИМдин башчылары ВИЧке чалдыккан согушкерлерди жан кечти болууга мажбурлап жатат деп жергиликтүү активисттердин терроризмге каршы тобуна таянуу менен жазган.
"Ислам мамлекетиинн" согушкерлеринин арасында ВИЧке кабылгандар аз эмес, көпчүлүгү баңгиликке берилген же мурда кылмыш кылгандар. Экстремисттер басып алган аймактарда көп аял алуучулук жана сексуалдык кулчулук кеңири жайылгандыктан, оору тез тарап жатат.
"Ислам мамлекети" террористтик тобу бүгүнкү күндө дүйнөгө коркунуч жараткан негизги күчтөрдүн бири. Үч жыл ичинде террорчулар Ирак менен Сириянын көпчүлүк жерлерин басып алган. Андан тышкары, алар Түндүк Африка өлкөлөрүнө, тагыраак айтканда, Ливияга өз таасирин жайылтуу аракетин көрүп жатат. Ар кандай баалоолорго ылайык жалпы көлөмү 90 миң чарчы чакырымга жеткен өз көзөмөлүндөгү жерлерде ИМ халифат жарыялап, өз мыйзамдарын жана бийлик органдарын орноткон.
Экстремисттик уюмдун мүчөлөрүнүн саны да ар түрдүү жана 50 миңден 200 миңге жетет. ИМге каршы күрөш жүргүзүүчү бирдиктүү фронт жок: ага Сирия менен Ирактын өкмөттүк жоокерлери, АКШ башында турган эл аралык коалиция (азырынча абадан сокку уруу менен гана), күрддөр, ливан жана ирак шейиттеринин ыктыярчылары каршылык көрсөтүүдө. Согуш аракеттеринин натыйжасында, жүз миңдеген карапайым эл курман болуп, дагы бир нече миллиону качкынга айланган.
