БИШКЕК, 20-авг. — Sputnik. Премьер-министр Темир Сариев Орто-Сай базарынын айланасындагы мыйзамсыз курулган курулуштарды алдыруу боюнча ишти улантып, үч күндүн ичинде базардагы санитардык жана коопсуздукка байланышкан абалды иретке салуу тапшырмасын берди.
Маалыматка ылайык, аталган аймакта айрым жерлер 2006-жылы курулуш иштери үчүн мыйзамсыз берилип кеткен.
Сариев бул боюнча укук коргоо органдарына кайрылып, мыйзамсыз чечим кабыл алгандардын жоопкерчилигин кароо керектигин билдирди.
"Бир ууч адамдардын кызыкчылыгынан улам шаардын тургундарына ыңгайсыздык жаралбашы керек. Мыйзамда көрсөтүлгөн талаптардын негизинде мындай кемчиликтин баары жоюлуп, шаарыбыздын тургундарына ыңгайлуу шарт түзүлүшү керек. Муну бизден эл талап кылып жатат", — деди премьер-министр.
Сариев үстүбүздөгү жылдын 1-октябрына чейин оңдолуп бүтө турган жолдордун сапатына көңүл буруу керектигин эскертти.
