БИШКЕК, 13-авг. — Sputnik. Казакстандан Кыргызстанга көп киши келип жатканын Мамлекеттик чек ара кызматынын маалымат кызматынын жетекчиси Гүлмира Бөрүбаева Sputnik агенттигине билдирди.
Анын айтымында, Кыргызстан тараптан керек болгон бардык аракеттер жасалды. Кыргызстандын Евразиялык экономикалык биримдикке толук кириши менен 12-августта кыргыз-казак чек арасындагы бажы көзөмөл пункту алынган.
"Салык кызматынын кызматкерлери бизге эки жума бою кеп-кеңештерин берип турат, калгандарынын баары жайында. Чек арачылар радиациялык текшерүүлөрдү жасап, чек арадан өткөн жүктөр боюнча маалымат берип жатышат", — деди Бөрүбаева.
Экономика министрлигинен билдиришкендей, калк арасында жана бизнес чөйрөсүнүн өкүлдөрү арасына түшүндүрүү иштерин жүргүзүү үчүн атайын штаб түзүлүп, ага министрликтер менен ведомстволор кирди.
