БИШКЕК, 12-авг. — Sputnik. ЕАЭБге мүчө болуу алкагында кыргыз-казак чек арасындагы бажы көзөмөлү бүгүн алынып, ага Кыргызстан менен Казакстандын президенттери Алмазбек Атамбаев жана Нурсултан Назарбаев телекөпүрө аркылуу катышты.
Салтанатта сүйлөгөн Казакстандын президенти Назарбаев ЕАЭБ алкагындагы макулдашуулардын бардыгы орундалышына ишеним артып, эки мамлекеттин арасында келишпестиктер жоктугун айтты.
"Урматтуу кыргыз баурлар, бүгүнкү өтө жакшы жаңылык, чек арадагы бажы көзөмөлүнүн алынып салынышы менен куттуктайм. Тууган эки элдин арасында эч кандай тоскоолдук болбосун. Мамлекет болгондон кийин анын чек арасы, анын коопсуздугу болот. Менин баамымда биздин келишпеген маселелерибиз жок, ал эми ЕАЭБ рамкасындагы макулдашуулардын бардыгы орундалат деп ойлойм. Эки элдин арасында карым-катнаш соода-сатык мындан да жогору болушу керек. Мен кыргыз элинде чын жүрөгүмдөн жакшылык береке жана тынчтык тилейм. Касиеттүү Ысык-Көлдүн жээгинде туруп айткан сөздөрүбүздүн баары Алланын кулагына жетсин", — деди Назарбаев.
Ал Казакстандан Кыргызстанга келген инвестиция көлөмү 1,5 миллиард долларга жеткенин, учурда биргелешкен 50 ишкана иштеп жаткандыгын айтты. Андан сырткары Казакстандан келген туристтер үчүн кыска жол куруу боюнча долбоор иштелип жаткандыгын кошумчалады.
