БИШКЕК, 6-авг. — Sputnik. Кыргызстандын Евразиялык экономикалык биримдигине толук кошулушу бир канча күндү ала турганын экономика министри Олег Панкратов билдирди.
Кыргызстандын Евразиялык экономикалык биримдигине кошулушу боюнча келишимге 2014-жылдын декабрында Москвада өткөн Жогорку евразиялык экономикалык кеңешинин жыйынында кол коюлган. 22-майда президент Алмазбек Атамбаев өлкөнүн аталган биримдикке кирүүсү боюнча эл аралык келишимдерди ратификациялоо боюнча мыйзам долбооруна кол койгон. Жакында эле Казакстан акыркылардан болуп Кыргызстандын ЕАЭБге кирүүсү боюнча бардык документтерди ратификациялады.
Мамлекеттер ортосундагы чек ара Евразиялык экономикалык комиссия Кыргызстандын биримдикке кошулушу боюнча тийиштүү документке кол койгондон кийин гана ачыла турганын экономика министри Панкратов билдирди.
"Бүгүн документтер Тышкы иштер министрлигине келип түштү. Жакынкы эки-үч күндө нота Евразиялык экономикалык комитетке жиберилет, документке кол коюлган күнү ЕАЭБ келишиминдеги бардык шарттар күчүнө кирет", — деди ал.
Панкратов белгилегендей, Кыргызстандын биримдикке кириши боюнча документке ЕЭК кол койгондон кийин ЕАЭБ мамлекеттери менен бирдиктүү бажы тарифи ишке кирет. Ошондой эле Кыргызстан менен Казакстандын ортосундагы бажы көзөмөлү алып салынат. Андан сырткары, кыргызстандык эмгек мигранттары үчүн да бир катар жеңилдиктер каралат. Алар медициналык кароонун айрым бөлүктөрүнөн бекер өтүүгө, ошондой эле билим алуу жаатында да мүмкүнчүлүктөрдү алат.
ЕАЭБ Бажы биримдигинин негизинде түзүлгөн. Анын мүчөлөрү Армения, Белоруссия, Казакстан жана Россия.
