БИШКЕК, 3-авг. — Sputnik. Каржы министрлиги 2016-жылдын республикалык бюджети жана 2017-2018-жылдарга карата божомол боюнча аймактарда коомдук угууларды өткөрөт. Бул тууралуу министрликтин маалымат кызматы билдирди.
Маалыматка ылайык, коомдук угуу 3-5-августта Ош жана Жалал-Абад шаарларында, 10-12-августта Нарын, Каракол шаарларында өтөт. Коомдук угууга каржы министринин орун басары, жарандык коомдун өкүлдөрү, ЖМКлар, жергиликтүү өзүн-өзү башкаруу органдары жана облустук, райондук администрациялардын жетекчилери катышат.
Бюджет боюнча угуулар мамлекеттин каржыларын натыйжалуу пайдаланууга багытталган. Ошондой эле ал бюджеттин ачыктыгын, кызыктар тараптардын коомдук угууларга катышуусун камсыздайт. Алар өз сунуштарын жана суроолорун тийиштүү кишилерге бере алышат. Айтылган бардык сунуш-пикирлер Каржы министрлиги тарабынан каралат.
Мындай иш чаралардын аймактарда өткөрүлүшү алыскы райондордогу эл менен байланышты чыңдап, кийинки жылдын бюджетин натыйжалуу пландап алууга жардам берет.
