БИШКЕК, 31-июль — Sputnik. Ош шаарында биометрикалык маалымат боюнча шайлоочулардын идентификациясын тестирлөө болуп, ага биринчи вице-премьер-министр Тайырбек Сарпашев катышты.
Шайлоочулардын идентификациясын тестирлөөнүн жүрүшүндө жергиликтүү тургундар өздөрүнүн биометрикалык маалыматтары аркылуу шайлоо процессине катышуунун жолдору менен таанышты.
Сарпашев бул практикалык иш-чара парламенттик шайлоого даярдыкты бир топ жакшыртарын айтты.
"Ош шаарында 73 шайлоо участкасынын бардыгында идентификация өткөрүүнүн тесттик режими болот. Мындай тестирлөө аркылуу биз бир топ өксүктөрүбүздү, кемчиликтерди толуктап, ар тараптан эске алынуучу маселелерди карап жатабыз. Мисалы, идентификациядан өткөрүүчү аппараттардын оперативдүү иштөөсүн текшерип кайсы шайлоо участкасына канча аппарат керектигин аныктап жатабыз. Себеби, шайлоочулар кезек күтүп калбоосу керек. Операторлордун иштөө жөндөмдүүлүгү көзөмөлдөнүп жатат", — деди Сарпашев.
Тестирлөө учурунда, каттоосу айылында болгондуктан идентификациясы чыкпай калган шайлоочулар да катталды. Алар шайлоого 15 күн калганга чейин өзү жүргөн аймакта шайлоого катышуу тууралуу арыз жазуусу керек.
