БИШКЕК, 31-июль — Sputnik. Депутаттарга фракция курамынан чыгууга тыюу салынган мыйзамга президент Алмазбек Атамбаев кол койгонун өлкө башчынын маалымат кызматы билдирет.
Маалыматка ылайык, 2014-жылдын сентябрь айында Конституциялык палата депутаттык топтордун түзүлүшү Баш мыйзамга туура келбейт деген чечим кабыл алган. Аталган мыйзам карама-каршылыктарды жоюу үчүн иштелип чыккан.
Мыйзам депутаттарга фракциядан тыш эркин депутат катары же депутаттык топ курамында ишмердүүлүк жүргүзүүгө тыюу салат. Документ кол койгон күндөн баштап күчүнө кирди.
Жогорку Кеңеште 2010-жылдан тарта "Өнүгүү", "Ынтымак", "Демократтар" жана "Реформа үчүн" төрт депутаттык топ түзүлгөн. Учурда парламентте "Ата-Журт", КСДП, "Ар-Намыс", "Республика" жана "Ата Мекен" партиялары өз мөөнөтүн аяктоо алдында турат. Жогорку Кеңешке шайлоо 4-октябрга белгиленди.
