БИШКЕК, 24-июль — Sputnik. Өкмөттүн жыйыны учурунда премьер-министр Ала-Букадагы "Бозумчак" кенин толук кубаттуу ишке киргизүү тапшырмасын берип, ал эми ага тоскоол кылгандардын жоопкерчилигин кароону тапшырды. Бул туурасында өкмөттүн маалымат кызматы билдирди.
Өкмөт башчысы Сариев жол тосуу адатынан арылуу зарылдыгын айтып, саналуу кишинин таарынычынан улам бүтүндөй комбинаттын ишин үзгүлтүккө учуратуу туура эмес экенин кошумчалады.
23-июлда "Бозумчак" кенине кеткен жол өтүүчү Көк-Серек айылынын 50гө жакын жашоочусу аталган кен жайын иштеткен "Казакмыс Голд Кыргызстан" компаниясына бир нече талаптарды коюп, жол тосууга чыгышкан. Алар негизинен комбинатка жергиликтүү элден жумушка алуу жана айылдын жолун асфальттоо талаптарын коюшкан.
