БИШКЕК, 20-июль — Sputnik. Биринчи вице-премьер министр Тайырбек Сарпашев бүгүн Бишкек шаарынын активи менен жолуга турганын өкмөттүн маалымат кызматы кабарлайт.
Билдирүүгө ылайык, Сарпашев бишкектиктер менен биометрикалык маалымат чогултуунун экинчи баскычын жана шайлоочулардын тизмесин түзүүнү талкуулайт.
Буга чейин биринчи вице-премьер Кыргызстандын түштүк аймагын кыдырып, жергиликтүү тургундар менен биометрикалык маалымат тууралуу түшүндүрүп, элдин пикирин уккан.
Ал эми өкмөттүн кезектеги жыйынында Сарпашев 1-июлдан 30-июлга чейин жергиликтүү бийлик үймө-үй кыдырып, жеке маалымат тапшырууга үлгүрбөй калган адамдардан биометрикалык маалымат жыйнай турганын билдирген.
Анын айтымында, жаңы жабдуулар жакынкы арада Япониядан алып келинет.
Бүгүнкү күндө Кыргызстанда биометрикалык маалымат тапшырган жарандардын саны 2 миллион 570 миңге жетти.
