БИШКЕК, 1-июль — Sputnik. Биометрикалык маалымат тапшырган шайлоочулардын жаңыланган сапаттуу тизмеси 1-сентябрга даяр боло турганын биринчи вице-премьер-министр Тайырбек Сарпашев билдирди.
Сариев алдыдагы парламенттик шайлоого даярдык жогорку деңгээлде болушу керектигин белгиледи.
"Бардык уюштуруу иштерине жана биометрикалык маалымат тапшырган шайлоочулардын так тизмесин түзүүгө өкмөттүн облустагы өкүлдөрү, район акимдери керт башы менен жооп берет", — деди премьер-министр.
Жыйындын жүрүшүндө биринчи вице-премьер-министр Тайырбек Сарпашев 1-июлдан 30-июлга чейин жергиликтүү бийлик үймө-үй кыдырып, жеке маалымат тапшырууга үлгүрбөй калган адамдардан биометрикалык маалымат жыйнай турганын билдирди.
"Август айынан баштап шайлоонун жаңы технологияларын өздөштүрүү үчүн IT-адистер менен операторлор окуудан өтүшөт. Ошол эле убакта ар бир айылда жаңы жабдыктар текшерилет. 1-сентябрга карата каттоо кызматы шайлоочулардын такталган, сапаттуу жаңы тизмесин даярдашы керек", — деди Сарпашев.
Анын айтымында, жаңы жабдуулар жакын арада Япониядан алып келинет.
Бүгүнкү күндө Кыргызстанда биометрикалык маалымат тапшырган жарандардын саны 2 миллион 570 миңге жетти.
