Атамбаев Абдраимовго шайлоо жогорку деңгээлдеги даярдык менен өтүшү керектигин айтты

БИШКЕК, 16-июль — Sputnik. Президент Алмазбек Атамбаев Шайлоо жана референдум өткөрүү боюнча борбордук комиссиянын төрагасы Туйгунаалы Абдраимовду кабыл алганын өлкө башчысынын маалымат кызматы билдирет.

Жолугушуу учурунда Абдраимов президентке өлкөнүн шайлоо системасын жашыртуу боюнча жүргүзүлүп жаткан иштер тууралуу маалымат берди.

Анын айтымында, учурда күзүндө боло турган парламенттик шайлоого даярдык кызуу жүрүп жатат. Мындан тышкары, Абдраимов жарандардын биометрикалык маалымат чогултуу, добуштарды электрондук саноодон өткөрүү боюнча айтып, БШКнын шайлоочулардын сапаттуу тизмесин түзүү жана добуштарды саноо процессинин ачык-айкындуулугун камсыздоо боюнча аракеттерин белгиледи.

Атамбаев Абдраимовго шайлоо акыйкат жана таза өтүшү керектигин билдирип, ага жогорку деңгээлдеги даярдык зарыл экенин айтып өттү.

Күз айларында өтө турган парламенттик шайлоо алдын ала маалыматтарга ылайык 4-октябрга белгиленүүдө.