БИШКЕК, 16-июль — Sputnik. Шайлоо өлкө башчы белгилеген күнү, б.а., 4-октябрда өтө турганын Борбордук шайлоо комиссиясынын мүчөсү Рашид Бекбасаров алдыдагы парламенттик шайлоого арналган тегерек столдо билдирди.
Анын айтымында, биринчи кезекте КР мыйзамы эске алынышы керек.
"Учурдагы парламент 10-октябрда шайланган. "Шайлоо жөнүндөгү" мыйзамга ылайык, добуш берүү мурунку чакырылыш шайланган айга белгиленет. Бул жылы шайлоо 4-октябрга туура келип жатат", — деди ал.
"Ата Мекен" фракциясынын өкүлү шайлоо депутаттардын ант берген мезгилине дайындалышы керектигин билдирди.
"Ант берүү аземи ноябрь айында өткөн. Бирок биз БШК чечими менен 4-октябрда боло турган шайлоого даярдык көрүп жатабыз", — деди атамекенчи.
Жарандык активист Алишер Мамасалиев шайлоо күнүн дайындоо партиялардын оюнуна айланганын айтып чыкты.
"Шайлоо күнүн туура белгилөөнүн мааниси чоң. Экономикалык кырдаал начарлап баратканынан улам бийлик шайлоону эртерээк өткөрүүгө кызыкдар" — деди ал.
Калган партиялардын өкүлдөрү шайлоонун октябрь айынын башына дайындалышына макул экенин билдиришти.
