БИШКЕК, 16-июль — Sputnik. Борбор калаада күн 45 градуска чейин ысышы мүмкүндүгүн Өзгөчө кырдаалдар министрлигинин маалымат кызматы билдирди.
Буга чейин Кыргызгидромет агенттиги 12-16-июль күндөрү күн адаттан тыш ысый турганын эскерткен.
Адистердин айтымында, абанын температурасын өлчөө жердин үстүнөн эки метр бийиктикте орун алган метеорологиялык будкалардагы термометрлер менен өлчөнөт. Башкача айтканда термометрлер көлөкөдө турат. Андыктан күн курч тийген аймактарда абанын температурасы 16-17-июль күндөрү болжонгондон бир топ жогору болушу ыктымал.
14-июлда күн 39,3 градуска чейин ысыган, бул 1928-жылы катталган максималдык ысыктан (37,8 градус) 1,5 градуска көп. 15-июлда абанын температурасы 40,1 градуска жетип, 1980-жылы катталган ысыктан (38,0 градус) 2,1 градуска көп болгон.
