БИШКЕК, 3-июль — Sputnik. Кыргызстандык аткаруучу Светлана Назаренко Sputnik агенттигине берген маегинде "Бишкектин ардактуу жараны" наамы ага эмне берерин билбей турганын айтты.
Май айында Бишкек шаардык кеңешинин депутаттары өз токтому менен 13 жаранга "Бишкектин ардактуу жараны" наамын ыйгарган. Алардын ичинде "Город 312" тобунун солисти Светлана Назаренко да бар эле.
Ырчы бул жаңылыкка таң калган деле жок, ашкере кубанганы да байкалбады. Анын айтымында, бул наам ага экинчи жолу ыйгарылып жатат.
"Наам биз Бишкекке келген учурда ыйгарылат. Бирок улам эле аягына чыгалбай калабыз. Атайы токтом менен Бишкектин ардактуу жараны болгонумду мен Москвадан билдим. Бир чети таң калсам, экинчи жагынан кайра эле баягы болот деп ойлодум", — дейт Назаренко.
Ырчы айым бул тууралуу азырынча эч кандай тастыктоочу документ ала электигин белгиледи. Мындан тышкары, Назаренко "Бишкектин ардактуу жараны" наамы ага эмне берерин билбей турганын кошумчалады.
"Мен бир билгеним, "Бишкектин ардактуу жарандарынын" катарында Чыңгыз Айтматов сыяктуу адамдар бар. Бул наам расмий берилбесе да, мен үчүн чоң сыймык", — дейт ырчы.
Буга чейин "Бишкектин ардактуу жараны" тизмесинде 130 адам катталган.
