БИШКЕК, 24-июнь — Sputnik. "Ыйман" дин маданиятын өнүктүрүү фонду Ош облусундагы жума намазы окулуучу 141 мечиттин имамдарына стипендия чектеди. Бул туурасында Ош облусунун мусулмандар казыятынын маалымат кызматынан билдиришти.
Имамдарга стипендия атайын аттестациядан өткөндөн кийин берилерин "Ыйман" дин маданиятын өнүктүрүү фондунун жетекчиси Нуржигит Кадырбеков Sputnik маалымат сайтына билдирди.
"Стипендия имамдардын, диний кызматкерлердин илим, билим, кесиптик деңгээлин көтөрүү максатында берилип жатат. Стипендия алыш үчүн адегенде имамдар муфтияттын алдында түзүлгөн комиссиянын аттестациясынан өтүшү керек", — деди Кадырбеков.
Фондунун жетекчиси жакында Кыргызстандагы бардык имамдарды билимин жогорулатуучу курстардан өтө баштарын кошумчалады.
