БИШКЕК, 22–июнь — Sputnik. Бюджеттин "Капиталдык салым" беренеси акыркы беш айдын ичинде 827 миллион сомго каржыланганын Каржы министрликтин маалымат кызматы билдирет.
Маалыматка ылайык, каражаттын 345,4 миллиону билим берүү, 20,3 миллиону саламаттык сактоо, 27,2 миллиону маданият жана спорт, 99,5 миллиону жол тармагындагы (автожол жана көпүрө) объектилерди курууга жумшалат.
Калган каражат турак жай-коммуналдык чарба объектилерин, суу чарба курулуштарын салууга жумшалат. Бул берененин каржыланышы жыл аралыгында ишке ашат.
Капиталдык салым — КР өкмөтүнүн токтому менен бекитилген объектилерди каржылоочу өнүктүрүү бюджетиндеги берене. Ал мамлекеттик социалдык-экономикалык маанилүү объектилерди өнүктүрүү үчүн пайдаланылат.
