БИШКЕК, 9 июнь — Sputnik. Бишкектеги бактар эскирип бүткөнүн "Зеленстрой" муниципалдык ишканасынын жетекчиси Анвар Атантаев билдирди.
Дүйшөмбү күнү кечки саат сегизде катуу шамал башталып, бактарды кулатып, электр түйүндөрү жабыркаган. ӨКМ маалыматы боюнча шамалдын ылдамдыгы секундасына 25-27 метрге чейин жеткен. Натыйжада 50гө чукул бак кулап, сегиз унаа жабыркап, үч жарнама такталары кыйраган.
"Бактардын жашы өзүнүн биологиялык курагынын чегине жетти. Ошон үчүн алар катуу шамалга туруштук бере алышкан жок", — дейт Атантаев.
Жетекчи муниципалитет жаңы көчөттөрдү отургузуп, эскилерин алмаштырып жатканын кошумчалады.
