БИШКЕК, 9 июнь— Sputnik. Бороондуу шамалдын натыйжасында бир катар жаңы конуштар жана Бишкектин бир катар турак-жайлары электр жарыгысыз калганын Sputnik агенттигине "Түндүкэлектро" ААК өкүлү Гуля Мураталиева билдирди.
Дүйшөмбү күнү саат кечки сегизде катуу шамал башталып, бактар, орнотулган көрнөк-жарнактар кулап, чатырлар сыйрылып, электр түйүндөрү үзүлгөн. ӨКМ маалыматы боюнча шамалдын ылдамдыгы секундасына 25-27 метрге чейин жеткен.
Мураталиева Көлбаев көчөсүндө бир нече жатакана, турак үй жана жеке секторду электр энергиясы менен камсыздаган трасформатордун күйүп, ал бүгүн калыбына келтирилерин кабарлады.
Маалыматка ылайык, облус боюнча 130 оперативдүү бригада, анын ичинен 33ү Бишкек шаарында иштеп жатат.
