БИШКЕК, 3-июнь — Sputnik. Бүгүн Кыргызстандагы автоунааларды каттоодон өткөрө турган акыркы күн.
Президент Алмазбек Атамбаев 2015-жылдын 27-февралында Кыргызстандын аймагына оң рулдуу автоунааларды ташып келүүгө жана каттоого тыюу салган мыйзамга кол койгон. Мыйзамда бул тыюу салуу жол кырсыктарын азайтуу максатында жасалып жаткандыгы жазылган. Мындай чектөө комуналдык, айыл чарбасы жана атайын техникаларга киргизилбейт. 3-мартта мыйзам "Эркин Тоо" гезитине расмий жарыяланып, ал үч айдан кийин күчүнө кире тургандыгы айтылган.
Кыргызстандын аймагына алып кирген оң рулдуу автоунааларды каттатканга жетишпегендер куру жалак калышат. Ал эми өз учурунда каттатпаган жеке тараптар 1000 сом, ал эми юридикалык тараптар 2000 сомдон айып тартышат. Бирок, каттоонун мөөнөтүн узартуу каралган эмес.
Мамлекетти каттоо кызматынан каттап, экзамен тапшыра турган борбордук бөлүмдө азырынча ажитож жоктугун, бирок, кечээтен тарта кезекке турагандар көбөйө баштагандыгын билдиришти.
Эгерде эл көбөйүп кетсе, каттоо бөлүмүнүн иш күнү узартылышы мүмкүндүгүн айтышты. Каттоодон өткөн оң рулдуу автоунаалар Кыргызстандын аймагында ээн-эркин жүрө алат.
