БИШКЕК, 2-июнь — Sputnik. Нарын облусунда автобус катышкан жол кырсыгы болбогонун КР ИИМдин Жол кайгуул кызматынын маалымат кызматы билдирди.
Мындай маалыматты өзгөчө кырдаалдар министрлиги да тастыктады. Анын маалыматына ылайык, 2-июнда таңкы саат 04:45 чамасында Бишкек – Торугарт унаа жолунун 290-чакырымындагы Кара-Бүк аймагында "Сетро-Марк" үлгүсүндөгү (мамлекеттик номери D49-46G) жүргүнчүлөрдү ташыган автобус 37 адам менен жарга такалып калган. Анын алтоосу жаш балдар.
ӨКМдин куткаруу бөлүмүнүн куткаруучулары окуя болгон жерге барып, жүргүнчүлөргө жардам берип, автобусту жолго чыгарышкан. Андан кийин жүргүнчүлөрдү башка автоунааларга салып жиберишкен.
Буга чейин бир катар ЖМКлар Бишкек – Торугарт жолунда автобус катышкан жол кырсыгы болгонун жазып чыгышкан болчу.
