Спайсты колдонгондор көбөйүп жаткандыгына Ош шаарынын вице-мэри тынчсызданды

БИШКЕК, 29-май — Sputnik. Ош шаарында баңгизаттарын колдонуу калктын, анын ичинен өспүрүмдөрдүн арасында кеңири жайылып бара жаткандыгы талкууланды. 

Ош шаарында 2014-жылдын эсеби менен алганда баңгизатка көз каранды болгон 1 463 адам каттоого алынган. Бул туурасында Ош шаарынын жалпы коллегиялык жыйынында облустук наркологиялык борборунун директору Айгүл Садиева билдирди.

Анын айтымында, баңгизатын колдонгондордун арасында отуз беш жашка чейинки жарандар басымдуулук кылат жана көбү эркек кишилер. 

"Ийне аркылуу баңгизатты колдонуучулар — 1302, анын ичинен 84ү аялдар. Ал эми 2015-жылдын биринчи кварталына баңгизатка көз каранды болгон тогуз киши каттоого алынган жана жалпысынан баңгизатка болгон көз карандылык менен 1472 оорулуу катталган. Өкүнүчтүүсү, алардын дээрлик жарымы 20 жаштан 35 жашка чейинкилер", — деди Садиева.

Мындан сырткары, өткөн жылы өспүрүмдөр жана жаштар арасында уулуу заттарды жыттоо, баңгизаттарды чегип  жана ийне менен сайынып колдонгондорду табуу максатында жашыруун анкета жүргүзүлүп, 10 миңге жакын өспүрүмдүн ичинен 115и өспүрүм "тобокелдиги бар" деген тайпага катталган. Уулуу заттарды жыттап жүргөн 3 өспүрүм диспансердик каттоого алынган. 

Жыйынга катышкан биринчи вице-мэр Замир Аскаров акыркы кездери жаш өспүрүмдөр арасында наркотикалык заттарды колдонгондор көбөйүп жаткандыгына тынчсыздануусун билдирди.

"Бул кезге чейин өспүрүмдөр арасында клей жыттоо дегени бар болсо азыр спайс дегени пайда болуптур. Биз маани бербегенибиз менен булардын түбү эртең ийне менен наркозаттарды сайынууга алып барат", — деди Аскаров.

Вице-мэр мындай кесепеттердин алдын алуу максатында Ош шаарынын мэриясы өспүрүмдөр менен иштей турган инспекциялар, мугалимдер, ата-энелер, бардыгы биргеликте чогуу иш алып баруу зарылдыгын айтты.