БИШКЕК, 19 май — Sputnik. Кыргызстанда Мамлекеттик салык кызматынын 2015-2017 жылдарга карата өнүгүү стратегиясы бекитилди. Тийиштүү токтомго премьер-министр Темир Сариев кол койгонун мекеменин басма сөз кызматы маалымдайт.
Жаңы стратегияда салык кызматынын учурдагы көйгөйлөрүн жана коопчулуктарын эске алуу менен, салык кызматынын миссиясы, негизги максаттары, ишмердүүлүгүнүн багыты, ошондой эле күтүлүүчү натыйжалар аныкталган.
Жаңы стратегияда МСК ишин коомдун жана мамлекеттин талаптарына жооп берүүгө жөндөмдүү заманбап салык администрациясына айландырууга багытташы керектиги аныкталган. Кызматтын негизги максаты салык башкаруусунун натыйжалуулугун жогорулатуу экени белгиленет.
Документ салыктык жүктөөлөрдү теңдөө, инвестициялык абалды жакшыртуу, толук кандуу салык чогултууну камсыздоо жана салык кызматын модернизациялоо маселелерин камтыйт.
Жаңы документке ылайык МКС иши төрт багытта аткарылат:
- МСК функцияларын жана иш процессин жакшыртуу;
- салык кызматынын кадр потенциалын күчтөндүрүү;
- салык төлөөчүлөрдү бул ишке шыктандыруу;
- салык чогултуунун потенциалын жогорулатуу.
“Биринчи багыт салык кызматынын функциясын жана структурасын оптималдаштыруу, ошондой эле иш процесстерин стандартташтыруу аркылуу ишке ашат”, — деп белгилешет мекемеде.
Экинчи багыттын алкагында эмгек жамаатты тандоо жана иш бөлүштүрүүдө коюлган жаңы талаптардын негизинде мекеменин кадр потенциалын күчтөндүрүүнү, иш жөндөмдүүлүктү баалоо системасын жакшыртууну, кызматкерлердин квалификациясын жогорулатып, стимулдаштыруу системасын киргизүүнү көздөйт.
Салык чогултууну жогорулатуунун принциптери төртүнчү багытта белгиленген. Анда кызматтын аналитикалык потенциалын күчөтүү, салык көзөмөлүнүн натыйжалуу механизмдерин ишке киргизүү жана салыктык жүктөөлөрдү теңдөө сыяктуу маселелердин чечилиши менен ишке ашуусу пландаштырылган.
Стратегия бюджетке түшүүчү каражат көлөмүн көбөйтүүнү көздөйт. Бюджетти толуктоо, мындан тышкары, экономиканын көмүскө секторунун үлүшүн азайтуу, МСК кызматкерлеринин деңгээлин жогорулатуунун эсебинен да жүргүзүлмөкчү.
