БИШКЕК, 8-апр. — Sputnik. Кыргызстандын Мамлекеттик салык кызматы Евразиялык экономикалык биримдикке мүчө өлкөлөрдүн салык кызматтары менен төлөнгөн кыйыр салыктар боюнча өз ара электрондук маалымат алмашууну баштайт.
Мурдараак ЕАЭБ мүчөлөрү, ошондой эле ага кошула турган мамлекеттер маалыматты тездик менен берүү жана коррупциялык коопчулуктарды кыскартуу үчүн документтердин электрондук жүгүртүүсүн күчтөндүрүү керектиги тууралуу кабарланган эле.
Документте байланыш түйүндөрү аркылуу электрондук маалымат алмашуунун тартиби, бул аракеттин коопсуздугун камсыз кылуучу маалыматты коргоо каражаттарын пайдалануу тартиби аныкталган жана анда товарларды алып кирүү жана кыйыр салыктарды төлөө жөнүндө арыздын формасы, аны толтуруу эрежелери камтылган деп белгиледи чиновник.
Россия, Белоруссия жана Казакстан 2014-жылдын 29-майында Астана шаарында Евразиялык экономикалык биримдик жөнүндө келишимге кол коюшуп, ал 2015-жылдын 1-январында күчүнө кирген. Май айында Кыргызстандын да аталган биримдикке кошулушу күтүлүүдө. Ошентип, КМШ аймагында экономикалык өнүгүүнүн жаңы жана күчтүү борбору боло турган эң ири жалпы рыноктун түзүлүшү аяктайт.
