БИШКЕК, 16-май — Sputnik. Ош шаарында 16-майда Энелер күнүнө карата майрамдык кече болуп, аны куттуктоолор, концерттик номерлер коштоду.
Салтанатка вице-премьер-министр Дамира Ниязалиева, Ош шаарынын мэри Айтмамат Кадырбаев, шаардык кеңештин депутаттары, 300дөн ашуун баатыр энелер, эмгек баатырлары, коомдук ишмер айымдар катышты.
Шаар мэри бүгүнкү күндө энелер тынчтыктын жана биримдиктин башаты экендигин белгилеп, бул күнү энелер жөнүндө кандай гана алкоо, мактоолор болбосун, баары орундуу экендигин айтты.
"Эне — үйдүн куту, турмуштун туткасы дешет элибизде. Сиздер ажарлуу жүзүңүздөр, айкөлдүгүңүздөр, акылмандыгыңыздар жана туруктуулугуңуздар менен биздин турмушубуздун көркүн ачып, ынтымактын, биримдиктин данакери жана сулуулуктун символу болуп келесиздер. Бул салыштыруулар жөн гана кооз сөздөр эмес, турмуш чындыгы экендигин эч ким тана албайт", — деди мэр Кадырбаев.
Энелерге баалуу белектер тапшырылып, Улуттук Филармониянын жана эстрада ырчыларынын коштоосунда концерттик программа тартууланды.
Бүгүнкү күндө Ош шаары боюнча 576 баатыр эне бар.
