БИШКЕК, 6-май — Sputnik. Экономика министри Олег Панкратов баш болгон кыргыз өкмөтүнүн өкүлдөрү түштөн кийин Москвага Евразиялык экономикалык комиссиянын жумушчу тобунун отурумуна катышуу үчүн учуп кетет. Бул туурасында Экономика министрлигинин маалымат кызматы билдирди.
Кыргызстандан бара турган делегацияны Экономика министри Панкратов жетектейт, анын курамында ЕАЭБдеги КРдин ыйгарымдуу өкүлү Үсөн Усупов жана Салык, Бажы кызматынын өкүлдөрү бар.
9-майда Кыргызстандын ЕАЭБге кирүүсү күтүлүп жатат. Россия, Белоруссия жана Казакстан 2014-жылдын 29-майында Астана шаарында Евразиялык экономикалык биримдик түзүү жөнүндө келишимге кол коюп, ал 2015-жылдын 1-январынан тарта күчүнө кирген. Ал эми КРдин ЕАЭБге кошулуусу боюнча келишимге Москва шаарында 2014-жылдын 23-декабрында Жогорку Евразиялык экономикалык кеңешинин отурумунда кол коюлган.
