БИШКЕК, 6-апр. — Sputnik. Малайзиянын аймагында авиа кырсыктан каза болгон экинчи пилот Айдана Байзиеванын сөөгүн сиңдиси бүгүн тааныган соң, аны КРге алып келүү же ал жактан жерге берилери анык болот. Бул туурасында КРдин Тышкы иштер министрлиги билдирди.
4-апрелде Малайзиянын борбору Куала-Лумпурга жакын жерде Субанг аба майданына келип конууга аракет кылган учурда малайзиялык "Cempaka Aviation sdn" компаниясына таандык тик учак кулап түшүп, анын кесепетинен алты киши каза болгон. Курман болгондордун бири, учкучтун жардамчысы кыргызстандык Айдана Байзиева болуп чыккан.
Кыргызстандын Малайзиядагы элчилиги каза болгон Айдананын Малайзиянын Мелака штатында жашаган сиңдиси Луиза Байзиева менен байланышкандыгын, бүгүн ал сөөктү тааныган соң, анын КРге "Жүк-200" менен алып келинери же ал жактан жерге берилери анык болорун ТИМ билдирди.
Маалыматтарга караганда, бул кырсыктан Малайзиянын премьер-министринин кызы менен казакстандык жарандын үйлөнүү тоюнан келе жаткан жергиликтүү чиновниктер жана чет элдик жарандар каза болгон.
ТИМдин берген маалыматында тик учак Куантандан (Паханг штаты) Субангга (Селангор штат) учуп, окуяга күбө болгондордун айтымында, абада эле жарылып, токойго кулап түшкөн. Каза болгондордун бардыгынын сөөгү өлүкканага жеткирилип, тик учактын кара кутусу Улуу Британияга экспертизага жөнөтүлгөн. Малайзиянын өкмөт башчысынын тапшырмасы менен кырсыктын себебин иликтеген атайын комиссия түзүлдү.
