БИШКЕК, 27-мар. — Sputnik. Ош шаарында 2014-жылы төрт бала өз өмүрүн кыйса, быйыл жыл башынан бери бир окуучу жашоо менен коштошкон деп Ош шаарынын маалымат кызматы билдирди.
Ош шаарынын вице-мэри ата-энелердин балдарга болгон кайдыгерлик мамилеси, өспүрүмдөрдүн психологиялык жактан жабыркоосуна алып келип жатат деген пикирин билдирди.
"Учурда баланы тарбиялоо, ага жетиштүү деңгээлде кам көрүү маселелери кийинки орунда калып, материалдык жактан толук камсыз кылуу жагын биринчи орунга чыгарып алдык. Мээримдин жетишсиздигинен эле, бала өз ордун бул дүйнөдөн таба албагандай сезүүдө. Андыктан, ар бир ата-эне менен биргеликте чогуу иш алып барсак, биз тараптан кандай иш алып баруубуз керектиги боюнча пикириңиздер болсо айтсаңыздар", — деди Эргешов талкуу учурунда.
Ош шаарынын тургуну Гүлмайрам Каныбекова мектептер ата-энелер менен биргеликте иш алып баруу зарылдыгын билдирди.
"Ата-энелер комитети гана кагаз жүзүндө иш алып барбастан чечкиндүү аракеттерди көрүүсү керек", — деди Каныбекова.
Республика боюнча былтыркы жылы мектеп жашындагы 94 бала өзүнүн жанын өзү кыйган. Саламаттыкты сактоо министрлигинин маалыматы боюнча, өткөн жылдын тогуз айында өлкөдөн ар түрдүү мүнөздөгү 92 зомбулук катталса, алардын 42 пайызы балдарга карата болгон.
