БИШКЕК, 10-мар — Sputnik. ЖККУнын башкы катчысы Николай Бордюжа журналисттер менен жолугууда Россиядан Кыргызстанга берилип жаткан аскердик-техника боюнча маалыматты жашыруун деп атады.
ЖККУнын башкы катчысынын КР журналисттери менен жолушугуусу Москвада жума күнү болду.
"Берилип жаткан куралдар, алардын түрү, саны жана кайсы жерге жеткирилгендиги туурасында айта албайм. Белгилеп айта кете турган учур — кыргыз армиясын кайра куралдандыруу макулдашылган ыраатта жүрүп жатат ", — деди Бордюжа.
Кыргыз армиясын кайра куралдандыруу боюнча кампания Россия президенти Владимир Путиндин 2012-жылдын сентябрь айында Кыргызстанга келген иш-сапары учурунда сүйлөшүлгөн. Россиялык жалпыга маалымдоо каражаттары кеп 1,1 миллиард долларлык аскерий-техникалык жабдуулар туурасында болуп жаткандыгын жазышкан.
Куралдуу күчтөрдүн Башкы штабынын жетекчиси Асанбек Алымкожоев буга чейин КР биринчи транш менен зооттолгон танкаларды жана артиллериялык куралдардын керектелчү тетиктерин жана 600 тоннадан ашык артиллериялык ок-дарыларды алгандыгын билдирген.
Ал эми күч түзүмдөрү боюнча вице-премьер-министр Абдырахман Маматалиев январь айынын башында техникаларды алып келүүнүн так мөөнөтүн айта албаарын, себеби, бул коомчулукка таратуучу ачык маалымат эместигин айткан. Ал ушул эле себептерден улам Россиядан келип жаткан аскердик техникалардын түрлөрүн да айта албай тургандыгын кошумчалаган.
