БИШКЕК, 24-фев — Sputnik. КРдин АКШдагы элчиси Кадыр Токтогулов дүйшөмбү күнү, 23-февралда АКШ президенти Барак Обамага Ишеним грамотасын тапшырды.
Президент Обама менен кыска аңгемелешүү учурунда АКШ менен КР ортосундагы эки тараптуу кызматташуу туурасында кеп болду.
Элчи Токтогулов өлкөдө жүргүзүлүп жаткан реформалар туурасында айтып берди.
Президент Обама эки өлкөнүн мурдатан келе жаткан мамилелерине токтолуп, акыркы жыйырма жыл ичинде эки эл маданияты, салттары туурасында таанышууга мүмкүнчүлүк жаралгандыгын айтты. Америкалыктар Кыргыз Республикасынын бай маданият казынасын: "Манас" эпосунан, Чыңгыз Айтматовдун чыгармачылыгынан тарта аялдардын кол өнөрчүлүгүнө чейин ачкандыгын кошумчалады.
"Биздин жалпы күн тартипти алдыга жылдырып жана биздин өлкөлөрдүн бекем достугун тереңдетүү үчүн сиз менен жасай турган ишти күтүп жатам", — деди Обама.
