БИШКЕК, 30-янв — Sputnik. Кыргызстандын үч жараны 27-январда Ливиядагы Corinthia мейманканасына болгон кол салуудан каза болгонун Кыргызстандын ички иштер министрлиги өлкөнүн Жарандык авиация агенттигине шилтеме берүү менен билдирди.
27-январда дипломатиялык аймакта күчтүү жарылуу болгон. РИА Новости билдиргендей, "Ислам мамлекети" террордук тобунун согушкерлери мейманкананын автоунаа токтотуучу жайынан автоунааны жардырып, мейманкананын ичине кирип жашынышкан. Имараттын ичинен болгон атышуудан 9 киши каза болгон. Кыргызстандык жарандардан сырткары филиппиндин эки, АКШ, Түштүк Кореянын жана Франциянын бир нече жарандары каза болгон.
Мекеменин маалыматына ылайык, каза болгон кыргызстандык жарандар "Манас" аэропортунда орун алган S.Group International компаниясында экөөсү борт коштоочу кыздар жана бирөөсү борт инженер болуп иштешчү.
Министрликтен билдиришкендей, учурда S.Group International компаниясы каза болгон кызматкерлеринин сөөгүн Кыргызстанга алып келүү аракеттерин көрүп жатат.
