БИШКЕК, 30-янв — Sputnik. "Көк-Жар" кичи районундагы азиздер үчүн жаңы курулган үйдөн квартиралар мыйзамсыз бөлүштүрүлгөн", — деп билдиришти маалымат жыйынында Кыргызстандын Азиздер жана дүлөйлөр коомунун мүчөлөрү.
Гүлсара Караеванын айтымында, жаңы үйдү пайдаланууга берүү акырын жана билинбей өттү.
"Көпчүлүгүбүз квартира алганга документтерди тапшырганбыз, болгондо да биз кезекте көптөн бери турабыз. Ошол эле учурда коомдун президенти Калыбек Мамбетакунов жаңы квартира алыптыр. Анын уулу менен кызы, ал турсун, катчысы да квартира алган экен. Ош шаарынын Азиздер жана дүлөйлөр коомунун өнөр-жай ишканалар башкармалыгынын директору Жапар Кожокеев мурда эле квартира алган, эми 2015-жылы анын балдарына үй тийди", — деп билдирди Караева.
Ошону менен катар бардык нааразы болгондор коомдун азыркы төрагасы Калыбек Мамбетакуновдун кызматтан кетишин талап кылды. Жана алар ишти териштирүүнү баштоо үчүн Ленин райондук прокуратурасына кайрылгандыктарын билдиришти.
Өз кезегинде Кыргызстандын Азиздер жана дүлөйлөр коомунун социалдык борборун жетектөөчү Темирлан Ормуков бардык нааразы болгондор аталган маселе боюнча кырдаалды "курчутуп жатышат" деп айтты.
"Алар абалды атайы солгундатып жатышат, себеби алдыда коомдун жаңы башчысын шайлоо жакындап калды. Алар Калыбек Мамбетакуновду ишинен алууну көздөп жатат", — деп белгиледи ал.
Ормуков жаңы турак-үйдү коомдун үч миңден ашык мүчөсү күтүп жатканын, жана квартира алууга талапкерлерди тандоодо алардын өз принциптери бар экенин кошумчалады. Бирок ал кайсы принциптер экенин тактаган жок.
Калыбек Мамбетакунов социалдык турак-жайды бөлүштүрүү боюнча отчёт талап кылып жаткандардын коомдон бөлүнүп берилген үйлөрү бар деп түшүндүрдү.
"Коомдун мүчөсү Гүлсара Караева 1987-жылы эле квартира алган. Кийин аны сатып, Сокулук районунан үй сатып алган болчу. Анын эки уулу — Казакстандын жарандары, азыр ал кичүү баласына, майып болбосо да, квартира сурап жатат. Ал баланын ата-энесинин үйү бар. Үйгө болсо Караева коомдун аркасы менен жеткен. Биздин коомдун дагы бир мүчөсү Айсулуу Жумазова №6-кичи райондон квартираны 2009-жылы алып, аны өзүнүн баласына берген. Экинчи баласына да квартира берилген болчу, бирок ал аны сатып жиберген. Эми Жумазова ошол экинчи баласына квартира сурап жатат. Менде турак-жайысыз ондогон азиздер кезекте турса, мен буларга кантип жардам бере алам?" — деп нааразы болду коомдун төрагасы.
Ошондой эле ал турак-жай кандай принциптер боюнча бөлүнөрүн айтып берди. Биринчи кезекте балалуу жаш үй-бүлөлөргө, жалгыз бой энелерге, үй-бүлө курууга мүмкүнчүлүгү жок жалгыз бой картаң майыптарга берилет.
Ишембиде борбор калаанын "Көк-Жар" кичи районунда 300 квартиралуу турак-үй пайдаланууга берилип, андан Азиздер жана дүлөйлөр коомунун мүчөлөрү квартира алышты. Алтымыш квартира көзүнөн майып болгондорго, 25 кулагынан майыптарга, ошондой эле төрт квартира жалпы ден соолугу боюнча майып адамдарга берилди. Үйдү куруу 2011-жылы башталган.
