БИШКЕК, 30 янв — Sputnik. 2014-жылдын 31-декабрына карата мамлекеттик карыздын көлөмү 3,647 миллиард долларды түзүп, ал өлкөнүн ИДПсынын 54,1%ына жакындап барды. Анын ичинен сырткы карыз 3,437 миллиард доллар (ИДПнын 50,9%ы), ички карыз 209,9 миллион доллар (ИДПнын 3,1%ы) болду. Бул туурасында Каржы министрлиги билдирет.
Кыргызстан баарынан көп Кытайдын экспорт-импорт банкына карыз. Аталган уюмдан алган кредиттин суммасы 1,115 миллиард доллар көлөмүндө. Ал эки тараптуу жеңилдик менен алынып, Бишкектеги борбордук жылытуучу станцияга жана жогорку кубаттуу электрэнергиясын өткөрүүчү Датка — Кемин линиясынын курулушуна алынган. Долбоор бул жылы башталып, 2017-жылы аяктайт.
Мындан сырткары аталган каржылык уюмдун каражатынын эсебинен, өлкөнүн түштүгүндөгү жогорку кубаттуу линиялар да реконструкцияланат.
