БИШКЕК, 21-янв — Sputnik. "Өлкөдө мамлекеттик-жеке өнөктөштүк майда товар экономикасы менен өрүш ала албайт", — деди Жоомарт Оторбаев Мамлекеттик жана жеке ишкерликтин өнөктөштүгү менен инвестиция тартуу боюнча өткөн форумда.
Анын айтымында, мамлекеттик жана жеке өнөктөштүк туурасында мыйзам чыккандан бери бул боюнча бир да документ аткарылган эмес. Оторбаев аталган сектордун токтоп калышына бир нече себептер бар деп эсептейт.
"Биздин экономиканын түзүмү чакан товарларга негизделген. Андан сырткары мамлекеттин экономикадагы катыштыгы алсыз, муну жакшы жагынан да, терс жагынан да кароого болот. Жеке сектор долбоорлорду демилгелегенге али жете элек. Буга себеп мамлекеттик-жеке өнөктөштүк боюнча долбоорлордун биздин өлкөдө жокту. Ал эми кемчилик жагыбыз катары — мамлекеттик органдардын бул багытка жеткиликтүү көңүл бурбагандыгын айтсак болот. Экономика министрлигинде мамлекеттик-жеке өнөктөштүк долбоорлору боюнча иш алып бара турган атайын бөлүм түзүлгөн. Алгач, биз ченемдик база жетишпейт деп ойлодук, аларды иштеп чыккандан кийин деле жыйынтык болгон жок. Анан акча керек экен деп ойлоп, өп-чап кирешебизден капиталы 2 миллион доллар болгон фондуну түздүк, анда деле натыйжа бербеди",— деп билдирди өкмөт башчысы.
Оторбаев бир нече мамлекеттик-жеке долбоорлордун ишке ашуусу жеке секторду келечектүү багыттары менен кызыктырып, мамлекеттин өнүгүшүнө инвестиция кылууга түртөт деген үмүтүн билдирди.
