БИШКЕК, 21-янв — Sputnik. Баш прокурорду колдогон митингчилер Бишкектеги Ак Үйдүн алдына чыгышты.
Акциянын катышуучуларынын айтымында, Ак Үйдүн жанына Салянованын отставкасына каршы болуп, бул боюнча атуулдук позициясын билдирүүнү каалаган КР жарандары чыкты.
Митингдин катышуучу Сагыйпа Исламованын айтымында, мамлекет башчысы Алмаз Атамбаев өзү маалымат жыйыны учурунда Салянова жакшы иштеп жаткандыгын жана отставкага кетпей тургандыгын билдирген.
"Анын эркектер жасабай турган ишти алып барып, жогорку кызматта отуруп коррупцияга баткан кызматкерлерди түрмөгө отургузгандыгын айтып суктанып жатканбыз. Бул жерден биз кайсы бир саясий оюнду көрүп жатабыз. Кечээ башканы, бүгүн башканы айткан Алмазбек Атамбаевден бул кадамдарына нааразы болуп турабыз. Ал эми кечээки жаңылыктарда анын күйөөсүн каралап чыгышты", — деди Исламова.
Акциянын дагы бир катышуучусу, Сокулук районунун тургуну Мелис Турсуниязов Кыргызстандын Башкы прокуратурасынын тарыхында, Саляновадай таза иштеген прокурор болгон эмес дейт.
"Ал коррупция боюнча козгогон иштеринин аягына чыгышы үчүн кызматында калышы керек. Эгерде иштен алса, бакиевдик мезгилге кайра кайтып келебиз. Эл кимдин иштеп, кимдин жөн гана жүргөнүн көрүп турат. Аны мажбурлап кетирип жатканы байкалып эле турбайбы", — деди Турсуниязов.
Бүгүн ЖКнын пленардык жыйынында Башкы прокурор Аида Салянованын өз ыктыяры менен жазган арызын карап канаттандырды.
Баш прокурордун кызматтан кетиши боюнча да коомдо ар кыл пикирлер жаралып, анын ишмердүүлүгүнө өздөрүнүн баасын беришүүдө.
