Хакерлер америкалык ЖМК аккаунттарын сындырып кирип, дүйнөлүк согуштун башталышы жөнүндө жарыялашты

БИШКЕК, 19-янв — Sputnik. Америкада New York Post гезити менен United Press International маалымат агенттигинин Twitter социалдык түйүнүндөгү аккаунттары сындырылган деп жазат РИА Новости Washington Times гезитине таянуу менен.

ЖМК маалыматтарына караганда, хакерлер бир нече жалган маалыматарды чыгарып, аларды жүздөгөн окурмандар кайра басканга үлгүргөн.

New York Post гезитинин аккаунту сындырылгандан кийин Кытай Элдик Респубилкасынын кемеге каршы ракетасы АКШнын атомдук ири учак ташыгычын талкалады деген жалган билдирүү пайда болду. Экинчи билдирүүдө болсо АКШнын Федералдык резервдик системасынын шашылыш отуруму өтүп, анда терс пайыздык үстөк төлөмдү киргизүү жөнүндө жарыяланганы айтылат. 

Гезиттин редакторлорунун бири аталган билдирүүлөрдү четке кагып, өзүнүн микроблогунда аккаунтту башкалар талкалап киргендигин жазган. Бардык жалган билдирүүлөр алып салынды, бирок аккаунтту ким сындырганы белгисиз. 

Андан тышкары, United Press International агенттигинин да аккаунту сындырылганы белгилүү болду. Анда да New York Post гезитинин профилине чыккан жалган маалыматтар менен катар, "Рим папасынын үчүнчү согуш башталганы жөнүндө билдирүүсү" жарыяланган.

Мурдараак АКШнын президенти Барак Обама менен Улуу Британиянын премьер-министри Дэвид Кэмерон кибер коопсуздугу тармагында кызматташтыкты кеңейтүү жөнүндө макулдашкан эле.