БИШКЕК, 5-янв — Sputnik. Кыргызстан мусулмандарынын дин башкармасынын расмий сайты хакерлердин чабуулуна кабылды. Муфтияттын маалымат кызматынын өкүлү Асан Саипов хакердик чабуул ишемби күнү, 3-январда жасалгандыгын билдирди.
Анын айтымында, мындай аракеттерди муфтияттын жана мамлекеттин жүргүзүп жаткан саясатына каршы болгондор жасашы мүмкүн.
"Мамлекет дин жаатындагы абалды жакшыртуу боюнча аракеттерди көрүп жатат. Балким, муфтияттын жана мамлекеттин жасап аткан иштерине каршы болгондор жасашы мүмкүн деп болжоп жатабыз. Кимдер жасаганын так айта албайбыз", — деди ал.
Белгилей кетсек, муфтияттын расмий интернет баракчасына киргенде сириялыктардын жана Палестинанын эркиндигин талап кылган #Free Syrian, #Free Palestine деген хэштектер жазылып, хакерлер Алжирден чабуул жасадык (#AttaCker fr0m Algeria) деген да хэштекти жазып коюшкан.
