БИШКЕК, 31-дек — Sputnik. Кытайдан бир белгисиз блогер Air Asiaнын учагы кулап түшөрдөн эки жума мурун учуулардын коркунучтуулугунан Малайзиянын аба компанияларынын кызматынан пайдаланбоону кеңеш кылган.
Reddit социалдык жаңылыктар сайтында блогерлердин бири 15-декабрда Кытайдын социалдык түйүнүндө Air Asia компаниясынын каттамдары менен учуу коопсуз эмес деп эскерткен пост пайда болгондугун жазган.
Билдирүүдө "2014-жылы 8-мартта Куала-Лумпур — Пекин багытында учуп бара жатып байланышы үзүлгөн Boeing 777-200 учагын атып түшүргөндөр Малайзиянын авиа компаниясынын дагы башка учагын да атат. Анын максаты — Малайзиянын авиа компанияларын жок кылуу, ошондой эле мунун баарына АКШнын тиешеси бар" деп көрсөтүлгөн.
Бир аз убакыттан кийин бул жазуу социалдык түйүндөрдө кеңири тарады.
Блогер "Эл аралык кара кол" деген аталыштагы кайсы бир уюм бар экендигин көрсөткөн.
"Кара кол MH370 жана MH17 учактарын кармап алып аткан. Бул чоңдугу жагынан дүйнөдө алтынчы орунда турган Malaysian Airline авиа компаниясын жок кылганга толук жетиштүү. Эми Кара кол Air Asiaны жок кылууну көздөп жатат, себеби ал да Малайзияга караштуу. Эгер бул авиакомпаниянын бортуна түшүп калсаңар, өлдүңөр дей бер. Ошон үчүн сак болгула", — деп жазат кытайлык блогер Landlord.
Тексттин авторун башында сынга алгандар көп болгон. Бирок эми социалдык тармактардын пайдалануучулары бул блогер Кытайдын коопсуздук кызматынын өкүлү же кандайдыр бир жол менен жашыруун маалыматты алган жана элдин өмүрүн сактап калайын деген хакер болушу мүмкүн деген ойлорун жазып жатышат.
Airbus Индонезиянын Сурабая шаарынан Сингапурга 28-декабрда учуп чыккан. Бир саатка жетпеген убакыттан кийин учкуч аба ырайынын өзгөрүүсүнө байланыштуу учуу багытын өзгөртүүгө уруксат сураган. Ага өйдө карай учпай, булуттуу аймакты айланып өтүүгө уруксат берилген. Себеби ал аймакта башка учактар да бар болчу. Андан соң авилайнер кырсык болгондугу тууралуу эч белги бербестен эле радарлардын экранынан жок болуп кеткен. Ошондо ал Индонезиянын Банка-Белитунг провинциясынын Танджунгпандана шаарынан түштүк-чыгышты карай болжол менен жүз деңиз мили аралыгында учуп бара жаткан. Учактын бортунда 162 адам бар болчу.
