БИШКЕК, 4-дек — Sputnik. Премьер-министр Жоомарт Оторбаев Башкырстандын президенти Рустэм Хафизов менен Уфада жолугушуу учурунда Кыргызстан менен Башкырстандын ортосундагы товар алмашуу жакшы жолго коюлуп жаткандыгын айтты. Бул туурасында өкмөттүн басма сөз кызматы билдирди.
Оторбаев Россия менен Кыргызстандын ортосундагы көп кырдуу соода-экономикалык кызматташтык негизинен аймактык байланыштар аркылуу аныктала тургандыгын белгиледи.
"Эки тараптуу сооданын 80%га чейинкиси эки мамлекеттин дал ошол аймактарындагы өнөктөштөрдүн иш-аракеттеринин аркасында ишке ашууда. Кыргызстан менен Башкырстандын ортосунда айыл чарба, өнөр жай, туризм тармагында кызматташтыкты өрчүтүүгө чоң мүмкүнчүлүктөр бар. Азыр КР менен Башкырстандын ортосундагы товардык айланууда оң жылыштар бар экендиги маанилүү. Алсак, 2013-жылдын жыйынтыгы боюнча эки өлкөнүн ортосундагы товар алмашуу 224 миллион 182,1 миң долларды түздү", — деп баса белгиледи премьер-министр.
Жолугушуунун жүрүшүндө тараптар көп маселелерди, анын ичинде Кыргызстанга минералдык семирткичтерди, ал эми КРден Россияга мөмө-жемиштер менен айыл чарба продукцияларын алып келүү, маданият жана билим тармагындагы кызматташтык маселелерин талкуулашты. 2015-жылдын мартында Башкырстандын Кыргызстандагы маданият күндөрүн уюштуруу жөнүндө макулдашылды.
Башкыртстанга болгон иш сапарынын алкагында Жоомарт Оторбаев жергиликтүү ишкер чөйрөсүнүн өкүлдөрү, республиканын алдыңкы окуу жайларынын ректорлору менен жолугушуп, "Алексеевский" совхозуна барып, ал жерде айыл чарбасын жүргүзүүнүн алдыңкы технологиялары менен таанышып кайтты.
