БИШКЕК, 8-апр. — Sputnik. Кытай коронавирус өз аймагында жайылып жатканда ал тууралуу маалыматты жашырып койгондугу үчүн жоопкерчиликке тартылуусу керек. Бул тууралуу Улуу Британиядагы "Генри Жексон коому" бирикмесинин "Коронавирус компенсациясы. Кытайдын потенциалдык күнөөсү жана юридикалык жактан кароо" докладында айтылды.
Отчетто пандемиянын дүйнөлүк экономикага тийгизген таасири Кытай бийлигинен жана алардын аракеттеринен көз каранды болгону айтылган.
"Эгер Кытай инфекция тууралуу эртерээк маалымат бергенде, вирус анын аймагынан чыкпай эле жок кылынмак. Эл аралык санитардык эрежелерге ылайык, көпкө созулуп, дүйнөгө тарай турган патогендер тууралуу бүткүл дүйнөгө так жана өз маалында маалымат берилиши керек эле", — деп жазылат отчетто.
Мындан улам коомдук бирикме Кытайга чыгымдын ордун толтуртуу маселесин коюуну сунуштап жатат.
"G7 уюмуна кирген өлкөлөр эле карантин учурунда ички экономиканы колдоого 4 триллион доллардан көп акча жумшашты. Демек компенсациянын суммасы мындан аз болбошу керек", — деп айтылат докладда.
Коронавирус тууралуу
2019-жылдын декабрь айынын аягында Ухань шаарында белгисиз өпкө оорусу жайылып баратканы байкалган. Оору деңиз азыктарын саткан базардан тараган. Адистер дарттын козгогучу коронавирустун 2019-nCoV деп аталган жаңы тиби экендигин боолголошкон. 11-март күнү Дүйнөлүк саламаттык сактоо уюму коронавирус боюнча дүйнөдө пандемия жарыялаган.
8-апрель эртең мененки маалыматка ылайык, дүйнө боюнча коронавирусту 1 430 141 адам жуктуруп, анын 301 130у вирусту жеңди. Ал эми көз жумгандардын саны 82 119 болду.
