БИШКЕК, 5-янв. — Sputnik. Америка президенти Дональд Трамп АКШга кол салына турган болсо Ирандын 52 объектисине өтө тездик менен катуу сокку урарын айтып коркутууда.
"Эскертүү болсун. Эгер Иран америкалыктарга же америка мүлкүнө сокку ура турган болсо, биз Иран жана иран маданияты үчүн маанилүү болгон 52 объектисин бутага алабыз (көп жыл мурун Иран тарабынан барымтага алынган 52 америкалык жарандар). Мунун баары Иран сыяктуу эле өтө тездик менен жасалган оор соккуга кабылат. АКШ кандайдыр бир коркутууларды каалабайт", — деп жазган Трамп Twitter баракчасына.
АКШ президенти Ирандын Багдадда өлтүрүлгөн генерал Касем Сулеймани үчүн өч алуу ниетин сынга алды. Трамп аны "террордук лидер" деп атаган.
РИА Новости агенттиги Трамп 52 туткун тууралуу айтып жатып, 1979-жылы ислам революциясынан кийин АКШнын Тегерандагы элчилигинин барымтага алынышын кеп кылганын божомолдоду. Анда АКШдан шах Мохаммед Реза Пехлевинин берилишин талап кылган төңкөрүшчүлөр 66 адамды барымтага алган. Кийинчерээк он үчү коё берилип, калган 52 адам 444 күн туткунда калып, 1981-жылы гана бошотулган.
Сулейманинин өлүмү
Россиянын тышкы иштер министри Сергей Лавров мамлекеттик катчы Майк Помпеого АКШ генералды өлтүрүү менен эл аралык укукту бузганын айткан. Ал эми Россиянын президенти Владимир Путин менен Франциянын башчысы Эммануэль Макрон Сулейманинин өлүмүнө кабатыр болуп жатышканын билдиришкен.
Ирак бийлиги өлкө аймагындагы америкалык аскерлердин ишмердүүлүгүнө чектөө киргизген чечим кабыл алды.
