Бул ролик Болливудда кадр сыртында ырдоо менен атагы чыккан пакистандык ырчы Рахат Фатех Али Хан "Banjarey" аттуу ырына тартылган. Анда баш каармандагы кыздын ролун Индиянын белгилүү актрисасы Ниту Чандра ойногон. Ал эми баш каармандагы жигиттин ролун бир нече эл аралык сулуулук сынактарына катышып келген кыргызстандык Нурсултан Айталиев аткарган. Ошондой эле кыргыздын улуттук кийимин кийген музыканттардын аспаптарда ойноп жатканын көрүүгө болот. Ролик сентябрь айынын башында Ысык-Көлдө жана анын ажайып тоолорунда тартылган.
Аталган клип 8-ноябрда YouTube тармагындагы Times Music атуу музыкалык каналына жүктөлдү. Аны бир күндө 700 миңден ашуун адам көргөн. Кийинчерээк актриса Чандра өзүнүн Instagram баракчасына бул клип YouTube каналында Индия боюнча трендге түшүп калганын жазган.
Рахат Фатех Али Хан — пакистандык ырчы, Болливудда жана Лолливудда кадр сыртында ырдаган ырчы катары белгилүү.
Буга чейин дагы индиялык ырчы Анкита Тивара Кыргызстандан тартылган клибин жарыялаган. Анда башкы ролду "Индия сулуу — 2015" сулуулар сынаганын жеңүүчүсү Адити Арья аткарган.
